Casa Desexo ten o programa de necesidades que o noso cliente pediunos e que tanta xente desexa, de aí o seu nome. Desenvolvidos nunha soa planta baixa dispón de tres habitacións, dous baños, salón, cociña, comedor, lavadoiro, rocho , adega con aseo e cuarto de apeiros, ceador, aparcadoiro para dous coches, piscina e suficiente soportal para utilizar o sol cando interese e resgardarse da choiva se é necesario. Todo iso en 274 metros cadrados construídos o que non está nada mal. É obvio que esta non é unha casa de baixo orzamento debido á superficie en planta. Así e todo o sistema construtivo e a elección de materiais fan desta vivenda un bo exemplo de como aforrarche diñeiro á hora de construír. Prescindiuse de moitos revestimentos tanto de parede como de teito e chans pero non por iso deixa de ser unha vivenda máis que digna. Os chans de cemento puído son máis económicos, modernos e elegantes. Os cerramentos de termoarcilla vistos son cálidos e seguimos aforrando. Non se necesita máis. Casa Desexo propón rebaixar o orzamento por metro cadrado da vivenda racionalizando espazos e aceptando uns acabados con carácter. Sen chegar a ser unha low cost estamos seguros de que Casa Desexo ofréceche por moito menos prezo as mesmas prestacións que vivendas polas que terás que pagar unha boa cantidade de cartos.